Musekstheater fir Kanner
Tolo & Scoia…
… wann zwee sech streiden, freet sech den Drëtten
Zwee Kaweechelcher, e Sträit an e puer Iwwerraschungsgäscht – eng Geschicht, déi bewosst einfach bleift. Keng schnell Billerwiessel, keng spektakulär Effekter. Dofir vill Pabeier, Schéier a Faarwen, vun Hand gemoolte Biller, déi verréckelt a beweegt ginn. Alles entwéckelt sech live virum Publikum – roueg, gräifbar, mat vill Léift fir den Detail an enger ganz eegener Raffinesse.
„Back to the basics“ ass dobäi net nëmmen ee Motto, mee eng kloer Haltung. D’Geschicht reiht sech an „d’Semplice-Serie“ vun Toile Si-Re an. Echt Handaarbecht steet dobäi am Mëttelpunkt: gräifbaart Material an d’Beweegen, d’Tässelen, d’Schneiden, d’Peschen an d’Verwandele vu Pabeier. Eng Aluedung fir nees wouer ze huelen, wéivill een aus einfache Saachen kann eraushuelen, an dëst ouni techneschen an elektroneschen Opwand. Leinwand, Kamera a Beamer vergréisseren dobäi just, wat vun Hand entsteet.
Wéi en eegenen Erzielfloss leet sech déi zur Geschicht komponéiert Musek iwwert déi projezéiert Biller. De Saxophon lieft duerch eng besonnesch Klangsprooch, opgebaut op de Modi vum Olivier Messiaen. Friem an iergendwéi och net, virwëtzeg an iwwerraschend, taucht si de Publikum an eng spezifesch Héierwelt a weist, datt och esou ongewéinlech Musek hire Wee bei e ganz jonke Publikum fanne kann.
Dauer: 30 Minutten
Ouni Sprooch
Alter: ab 3 Joer
Lieu: Ciné Prabbeli, 8 Gruberbeerig, L-9538 Wiltz
Umeldung fir Schoulen
Schéckt eis w.e.g. eng E-Mail un info@cooperations.lu
6€ pro Kand (Gratis fir d’Léierpersonal)
Besetzung
Konzept an Geschicht: Annick Sinner & Nadine Kauffmann
Biller a Live-Animatioun: Annick Sinner
Kompositioun a Spill / Saxophon: Nadine Kauffmann
Produktioun: Toile Si-Re a.s.b.l
Koproduktioun: Kulturhaus Niederanven, Fondation EME
