Eng Geschicht iwwert de Klang vu Gefiller, Faarwen a Frëndschaft
Déi rout Faarf vermëscht sech mat der gieler, d’Blo geet an d’Gréng iwwer. Schwaarz Faarwewolleken tiermen sech op an danze mat dem rosa Niwwel. D’Faarwemonster ass doruechter. Seng Faarwen si komplett duerchernee geroden! Dat mécht et rosen! Nee, traureg... Oder fäertereg? Seng Frëndin d’Esmeralda wëll him beim Sortéieren hëllefen...
Wéi fillen ech mech? Wéi kann ech meng Gefiller ausdrécken? Fräi nom Buch vum Anna Llenas hunn d’Jenny Spielmann an d’Catherine Hengesch eng Klang-Erzielung inzenéiert, déi de Kanner spilleresch a musikalesch d’Welt vun den Emotioune méi no bréngt.
Dobäi hëllefen de Kanner net nëmmen déi verschidde Faarwen, hir Gefiller ze verstoen an ze identifizéieren. Mee si entdecken och mat Hëllef vun der Musek (ënner anerem mat Stécker vum Pharell Williams, Antonio Vivaldi oder Edvard Grieg), wéi ënnerschiddlech Kläng a Melodië bei eis verschidde Stëmmungen ausléisen an datt all Gefill seng Plaz verdéngt huet.
Kammerata Luxembourg
Jenny Spielmann, Catherine Hengesch, Konzeptioun, Spill. Frin Wolter, Akkordeon. Nathalie Ludwig, Klarinett. Unna Nousiainen, Braatsch. Anik Schwall, Cello. Claude Kraus, musikalesch Arrangementer.
Infoen
Klang-Erzielung fir Kanner fräi nom Buch vum Anna Llenas
Op Lëtzebuergesch
3-6 Joër
Dauer: 40 Minutten
Kulturpass
Den Entrée mam Kulturpass ass an der Oweskeess méiglech. Well mir dofir eng Bestätegung vun Ärer Identitéit brauchen, froe mir Iech, Äre Kulturpass mat op d'Evenement ze bréngen.
Service Fee
Op all Ticket (ausser dem Kulturpass-Tarif) gëtt eng "Service Fee" vun 2€ berechent. Merci fir Äert Versteesdemech.
